Даавуу дээлээ нимгэлмээр бүгчим ч юм шиг
Дааган харыг эсгэрмээр давилуун ч юм шиг
Дандаа л босож хараймаар оргилуун ч юм шиг
Данагар данагарыг аялмаар хөхүүн ч юм шиг
Бүлээн салхи мэт биеэр хайр урсана
Бүсгүйн харц зөөлнөөр сэтгэлд урсана
Орсон буур шиг энэ зүрхийг яана
Одоо яг дэлбэрвэл түймэр ч болж мэдэхнээ
Үхсэний хойно миний хайраар юу хийнэ
Үлээвэр хөгжим их л сайндаа хийсгэж одно
Чи мэдвэл ичингүйрч үлдэнэ
Чийгийн улаан өт огт мэдэлгүй өнгөрнө
Тэгэхээр эхэлж шувуунд хэлье, тэнгэр мэдэг
Тэсгэлгүй ногоонд шивнэе, газар мэдэг
Хайр гэдэг "өвчин" халдваргүй нь яамай
Хавийн бүсгүйд тараавал хараал тусч мэднэ
1993.8.16 Цэцэрлэг хот
English
