ТЭНГЭРИЙН ЗҮҮД

Тэнгэрийн зүүд шиг 

томоогүй ааль

Тэнгисийн хаялга аятай 

торомгор харц

Дэлхийн энтэй

дуулим эгшиглэн

Дэвэрч асгарах 

сар шиг хайр ...

Хатан тунгамал 

харзны мэлмэрээ

Хайрын хэлмэрч 

шувуудын жиргээ

Хавар намрын 

тунамал зэрэглээ

Ханарч намирах 

өвсөн сугсраа ...

Ханзран хөлрөх цаснаас 

гуйсийм, чамайг

Хайрхандаа ч харуулалгүй 

нуусан юмсан

Хангайн цэцэгтэй алаглан 

таньж ядахад

Хацраас чинь 

солонго татсийм

Хаяанаасаа гийн 

огторгуй баясаж

Хорин нэгэн зуун 

гайхалдан зог туссийм

Хоёр сэтгэлийн далай 

сүлэлдэн уулгалж

Хорвоогийн бүх жаргалан 

давалгаалан цалгисийм

Чинэрэн лугших 

дэлхийн судас -

Чиний хайр, зүйрлэл үгүй 

их далайн түрлэг мэт ...

Дэлгэж барьсан сэтгэл минь 

дэлхийн энтэй

Дэндүү чиг тормогор нүдэн чи 

сарны тамгатай

Дэвэрч асгарах хайр 

тэнгэрийн гэлтэй

Дэлгэрхэн эвлэг ааш чинь 

тэнгисийн хаялга аятай.

2024.8.27 Улаанбаатар хот