Үнэний хар суран бугуйл

Өөдөө тэнгэр доошоо газар самардана

Үргэсэн хангалын самсаа богширч

Үйлээс мултарч ядан

Үнэнээс дайжиж ядан хуухирна

Адгуусны толгой онохгүй гэж

Аав илт голно

Өвсөн толгой шүүрч алдан

Үзтэл цойлж нисэхэд бэлэн

Хүчит хангал сүргээс дайжин

Хөөрсөн зүрхээ дарж ядан

Эр бярын дэвжээн дээр

Хүнтэй зодоглох эгшин болгоож

Элээний сүүдрээс займчин шуудрана

Эзний гараас мултран шуугина

Салхи бугуйлдсан миний цэц

Сайхан хээрийг гурав л өршөөв

Үнэний хар суран бугуйл

Үхлээс наахнуур ял оноож

Хүний гарт лавхан нухалж

Хүзүүний мах баран чивчрав

Хүслээр болдгүй амьдралын жам уруу

Хүлгийн хүү аажим эргэв

Хөөрхий эхээ дуудан чирлаж

Хүний аяыг хүчээр дагав

Үнэний хар суран бугуйл

Өөдөө тэнгэр доошоо газар самардана

Тэг дундуур нь бай шоволзоно

Тээглүүр шиг, жинлүүрийн хэл шиг шоволзоно

1993.8.19