Өвөг эцэг Батын Санж таныхаа ачлалын хариуд

ӨВӨӨ

Авсан ээж

     төрсөн эх шиг агсагдаж

Аав чихэнд

     миний нэрийг шивнэхэд

Арван тавны сар

     дүүрэгтээ багтахгүй мэлтэлзэж

Ачийгаа үзсэн өвөө

     жингүйдэж байсаан

Айл үлдээлгүй зарлаж

     хавхаа хий үсэргэж

Айраг хөхүүртээ буцлам

     хуурай агсамнаж байсан

Агтны сор

     арилжаа хээрийг зүслэн

Аанай л өөрөө

     мөнхөрсийм шиг сагсуурсаан

Азын мэргэн зоосны

     есөн цагаан шившиж

Алтан ембүү дэргэдээс

     хормой дүүрч асгарахад

Гунан шарын бяр

     цээжинд нь амтагдаж

Гурван усны нэрмэл шиг

     дотроосоо шатаж байсаан

Сар наранд тавьсан

     хөл хорионы дээс

Шар эсгий үүдээ

     чимээгүй манасан цээр

Дэлхийн хүнээс харамласан

     цөлх өвөөгийн хайр

Дээлтэй гэзэгтэй их монгол

     ачдаа л сөхөрч явсаан

Авсан ээж

     төрсөн эх шиг агсагдаж

Аав чихэнд

     миний нэрийг шивнэхэд

Арван тавны сар

     дүүрэгтээ багтахгүй мэлтэлзэж

Ачийгаа үзсэн өвөө

     жингүйдэж байсаан

 1996.9.12