Хойд Тэрхийн ай сав

                    хараагаараа зүүрмэглэхэд

Хархираа, Түргэний нуруунаас

                    тасарч ирсэн уул аа

Хан Бүргэдэйн хөвүүн

                   сарны зүүд зүүдлэхэд

Хархираа, Түргэний голоос

                   цалгиж ирсэн ус аа

Салхи гүйцэмгүй хурдны

                   туурайн галнаас цахилж

Шаагисан мөндөр цайруулж доргион

                   манайд буусан аз аа

Сансар бүтэн туулсан

                   одтой хамт харваж

Савтай сүү цалгиан

                   надад ирсэн хайр аа

Найрын ирмэг шуранхайнаас

                   найман шаргатай алдуурч

Намрын цэнхэр салхитай

                   дэгдэж ирсэн түрлэг ээ

Нар сар хурайлж

                   дэлхийг хөлд оруулахад

Намайг л гэж бүрэлдсэн

                   хувь заяаны төөрөг өө

1998.1.2