![](http://img843.imageshack.us/img843/714/79695396.jpg)
Тэр жил амьсгал хураасан эр цэрэг нойрсож байна
Тэр хавар амь тасарсан эцэг энд нойрсож байна
Сүйт бүсгүйнхээ гараас аягатай сүү амтлангаа
Сүүлчийн харцаа бэлэглэсэн арван наймт нойрсож байна
Эх хүн л болсон хойно элэг нь бүтэн эмтэрч
Эрлэгийн дайны шувтаргыг совингоороо мэдэрч
Эргэж уулзахын бэлэг баруун хацрыг ч үлдээлгүй
Ээлжилж үнсээд багтарсан ээжийн хүү нойрсож байна
Тэд хөрс шороондоо шингэжээ
Түмэн цэцэг болон хөрснөөсөө дэлгэрчээ
Тэд хөх тэнгэртээ шингэжээ
Түмэн гэрэл болон огторгуйд манджээ
Дээр нь тэнгэр гашуудна
Дэргэд нь цэцэг аргадангуй торойно
Дээр нь үүл бараалан зангирна
Дэргэд нь ногоо гандаж гудайна
Үхлийг ганц байгаль аргадаж
Үнэнийг харин хүн гуйвуулна
Тэр жил амьсгал хураасан эр цэрэг нойрсож байна
Тэр хавар амь тасарсан
Эцэг энд нойрсож байна
Сүйт бүсгүйнхээ гараас аягатай сүү амтлангаа
Сүүлчийн харцаа бэлэглэсэн арван наймт нойрсож байна!
1980.2.2 Дрезден-Көтен