ЭНЭ НАМРЫН ГУРВАН САР

ЭНЭ НАМРЫН ГУРВАН САР

Ээж минь эргэж ирнэ гэж

     хэлж явсан юм шиг

Энгэрийн ногоон тойруулганд

     мөөг цавцайна

Эх үрийн сэтгэлд

     нуурын шувууд дайвалзан

Эргэнэг хөх уулс

     нулимсанд бөхөлзөнө

Үсний минь мөнгөн хяруунд

     зун нэгэнтээ цантаж

Үдийн жин халуун

     нохой гаслааж барсангүй

Үглээ цагаан ботго

     зүүд хуваалцан уярахуй

Үлгэр өөртөө шивнээд

     дуусгалгүй жаргааж чадсангүй

Учир таньсан эхийн

     сэтгэл шиг дулаахан

Уулс минь намайг

     тойрч хоноход алзсангүй

Уулга алдах эхийн

     дэврэх цай шиг шуранхайлж

Улаан хадны цуурай

     намаржаа доргиоход сэрсэнгүй

Хүний сэтгэл гээч

     хөвсөрсөн их манан

Хүлхэж таашаах чихэр шиг

     амттай болоод уйдсангүй

Хүний сэтгэл гээч

     хөөсөрсөн их далай

Хөөцөлдөөд гүйцэмгүй инээд шиг

     жаргалтай болоод уйлсангүй

Их цармын салхийг

     гол шиг урсган

Ээжийн аялдаг дуу

     жалга жалгаас тодхон

"Бор борын бялзуухай"

     жиргэхгүй газар алга

Бодлоо өөртөө үлдээсэн хойно

     эхээсээ би өнчирсөнгүй

Ээж минь эргэж ирнэ гэж

     хэлж явсан юм шиг

Энэ намрын шувууд

     буцах янзгүй

Ээж минь гуйж

     хайраар далласийм шиг налгар

Энэ намрын гурван сар

     дуусах янзгүй

1995.11.10 Берлин-Франкфурт-Майн-Бээжин-Улаанбаатар


     
Bookmark and Share


Сүүлд нэмэгдсэн


ТӨГС ГЭГЭЭРСЭН ИХ БАГШ СУМА ЧИН ХАЙ  (Хөрөг нийтлэл) ТӨГС ГЭГЭЭРСЭН ИХ БАГШ СУМА ЧИН ХАЙ (Хөрөг нийтлэл)
Төгс Гэгээрсэн Их Багш Чин Хайн хөрөг нийтлэл
(1 жилийн өмнө)
ТӨГС ГЭГЭЭРСЭН ИХ БАГШ ЧИН ХАЙН СУРГААЛИЙН ТОВЧ ТОЛЬ ТӨГС ГЭГЭЭРСЭН ИХ БАГШ ЧИН ХАЙН СУРГААЛИЙН ТОВЧ ТОЛЬ
Авшиг хүртэнэ гэдэг бол агуу их сүнсээ танин ухаарах агшныг илэрхийлж байгаа юм. Авшиг хүртэх нь зө
(1 жилийн өмнө)
БУРХАН БАГШИЙН СУРГААЛ, ОШО БОГДЫН ТАЙЛБАР БУРХАН БАГШИЙН СУРГААЛ, ОШО БОГДЫН ТАЙЛБАР
АЗ ЖАРГАЛ: Ямар ч болзол үгүй зүгээр л таашаан баясахаас өөр аз жаргалд хүрэх зам үгүй.
(1 жилийн өмнө)

Онцлох шүлэг


Ном, бүтээлүүд


ДАРВИНЫ БИЧНЭЭС ЭНЕРГИЙН ОНОЛ ХҮРТЭЛХ ХҮМҮҮНИЙ ХУВЬСАЛ Экологийн боловсрол: Байгальд ээлтэй хүүхэд БАЙГАЛЬ ОРЧНЫ ТУХАЙ ШИНЭ БА ШИНЭЧИЛСЭН ХУУЛИУДЫН ТАНИЛЦУУЛГА Байгаль орчны шинэ хуулиудаас Хайрын ханасан уусмал Хөтөлгөө морьтой эцэг Мөнхрөхүй ухаан Цэцэг тоссон бүсгүй

Хуанли